На 24-ти мај православните христијани го слават празникот Свети Кирил и Методиј. На денешен ден именден празнуваат Кирил, Кире, Киро, Методиј, Мето, Менде…
Свети Кирил и Методиј се слави како ден на словенската писменост и култура кај нас, но и во Русија, Украина, Бугарија, Словачка, Чешка…
24-ти мај има големо значење за нас Македонците, пред сѐ како ден кога се слават првите словенски просветители и учители, а црковно светите браќа уште се нарекуваат и „рамноапостолни“.
Односно, се смета дека се рамни на апостолите во поглед на ширењето на христовата вера и религија.
Солунските браќа ја создадоа првата словенска азбука наречена „глаголица“, која имала 38 букви, превеле голем број црковни книги од грчки на словенски јазик, а оставиле огромно влијание врз ширењето на писменоста и воопшто на христијанството меѓу словенските народи.
На повик на царот Ростислав, тие заминале во Моравија каде ја распространиле и ја утврдиле христијанската вера, па ги умножиле книгите и им ги дале на свештениците да ја подучуваат младината.
Подоцна, на повик на папата заминале во Рим, каде Кирил се разболел и починал (на 14.02.869 година).
Методија се вратил во Моравија, па оттаму во Охрид, каде починал на 6-ти април 885-та година.
Нивното свето дело подоцна ќе биде продолжено од нивните ученици Климент и Наум, како и голем број други.
На почетокот, Црквата одделно го празнувала споменот на светите браќа, на деновите на нивното упокојување, но подоцна било утврдено дека светите рамноапостолни браќа треба да се празнуваат во ист ден, затоа што се браќа, но и затоа што извршувале иста дејност.
Прво се размислувало овој празник да се празнува само на 6-ти април, но со оглед на тоа што најчесто овој ден се паѓа за време на строгите велигденски пости кога е забрането свечено празнување, било одлучено датумот на празникот да се промени.
Во 1863-та година, за време на празнувањето на илјадагодишнината од Моравската мисија, било одлучено празникот на сесловенските просветители да се одбележува на 11-ти мај (според стариот календар) односно 24-ти мај (според новиот).
Кај нас, во рамки на овој ден се организираат голем број културни настани, но и свети литургии во црквите и манастирите.
Свети Кирил и Методиј се слави и како куќна слава, но и како именден на оние што ги носат имињата Кирил, Кире, Киро, Методиј, Мето, Менде…
