Денес се слави Свети апостол Филип. Именден слават сите што го носат неговото име, а воедно овој ден е познат и како „божиќни или филипови поклади“ – денот пред да започнат 40-дневните божиќни пости.
На денешен ден (27.11) православните христијани го слават празникот посветен на Светиот апостол Филип, кој се врзува со почетокот на божиќниот пост, кој уште се нарекува и божиќни поклади, односно денот кога се организира гозба пред почетокот на прочистувањето.
Празникот Свети апостол Филип е последен празник пред да започне 40-дневниот божиќен пост, период во кој верниците се чистат себеси со покајание, молитва и со чисти срца да го дочекаат денот на Рождеството Христово.
Овој ден исто така е познат и како „божиќни или филипови поклади“, а во минатото се сметало дека ова е ден за прошка и за веселба, па се организирале големи гозби.
Светиот апостол Филип ревносно го проповедал Евангелието во Азија и во Грција, каде Евреите сакале да го убијат, но Бог го спасил со моќни чуда. Така, еврејскиот архијереј кој сакал да го тепа Филип одеднаш ослепел и целиот почнал да поцрнува.
Во друга пригода имало силен земјотрес и земјата се отворила, па ги проголтала гонителите на Филип.
Во Фригискиот град Јерапол, свети Филип дејствувал заедно со свети Јован Богослов, со својата сестра Маријамна и апостолот Вартоломеј.
Таму имало некоја опасна змија, којашто незнабошците грижливо ја хранеле и ѝ се поклонувале како на Бог.
Божјите апостоли со молитва ја умртвиле оваа змија, а со тоа врз себе го навлекле гневот на помрачените луѓе.
По ова, Филип и Вартоломеј биле обесени на дрво. Луѓето побрзале да им помогнат, но успеале да го спасат само Вартоломеј, додека Филип починал. Неговите мошти биле пренесени во Рим.
