Дуелот на двата локални ривали Брегалница и Беласица заврши со победа на гостите кои со погодокот на Костадин Капсаров во 81. минута ги освоија трите бода.
Дербито не ги оправда очекувањата, но императивот да се дојде до победа очигледно дека беше пречка двата тима да се прикажат во најдоброто можно издание.
Брегалница имаше шанса прва да стигне до предност, но Ристе Темелков не успеа ударот од 11 метри да го претвори во гол. По денешниот триумф Беласица се приклучи во трката за највисок пласман.
ФК Новаци најубедливо триумфираше во ова коло над Слога од Виница со 4:0, три голови постигна Стефан Јовановски додека стрелец на еден гол беше екс Пелистерецот , Петар Љамчевски.
Екипата на ФК Преспа славеше над Големо Коњари со 4:2, а Каменица Саса и Детонит Плачковица играа без победник 2:2.
Лидерот Шкендија ја продолжи победничката низа откако на гостувањето во Неготино го совладаа Вардар со 2:1. Голот за нови три бода беше постигнат во петтата минута од судиското надополнување а стрелец беше Љупчо Трпески.
Први во водство дојдоа домаќините преку Мартин Младеновиќ во 70. минута. Девет минути подоцна Дарио Десниќ израмни на 1:1.
Во уште еден дуел на два тима кои се во трката за врвот, Охрид Лихнидос славеше над Скопје со 1:0. Натпреварот беше решен уште во 17. минута кога Иван Глигоров го совлада противничкиот чувар на мрежата.
Еден гол беше доволен Тетекс да забележи победа во мечот со Победа, мрежите мируваа на дуелот Кожув – Осогово.
Фото Новаци/ ффм
