На акутните и хроничните воспаленија во телото може да влијаете со тоа што ќе го контролирате начинот на живот и ќе внимавате на одредени нешта. За да се постигне ова, важно е да се даде приоритет на квалитетен сон, да се внимава како управувате со стресот и каква храна и пијалаци консумирате. Диететичарката Роксана Ехсани открива каков вид на чај е добро да се пие за да се намали воспалението во организмот и кој според неа е најдобар во таа примена.
Ехсани го издвојува чајот од ѓумбир како најдобар вид на чај за намалување на воспаленијата. Овој ароматичен чај „е богат со антиоксидантни и антиинфламаторни соединенија кои можат да се борат против воспалението“, тврди диететичарката.
Познато е дека ѓумбирот го смирува вознемирениот стомак, но тоа е само една од придобивките поврзани со него. Истражувањето објавено во списанието „Molecules“ во 2022 година покажа дека соединенијата во овој чај можат да го стимулираат природниот антиоксидативен одбранбен систем на телото да ги неутрализира штетните молекули кои можат да ги оштетат клетките и да предизвикаат воспаление.
Зошто ѓумбирот е ефикасен во намалувањето на воспалението?
„Ѓумбирот е особено ефикасен бидејќи може да ги намали симптомите на воспаление како болка, треска и оток“, истакнува Ехсани. Таа додава дека „некои истражувања сугерираат дека ѓумбирот може да биде ефикасен природен лек за болка, како што е ибупруфенот“.
Слично на тоа, една студија од 2020 година објавена во списанието „Nutrients“ покажа дека дополнувањето со ѓумбир може да ги намали телесните масти и да помогне во намалувањето на нивото на холестерол и шеќер во крвта, кои се клучен ризик за развој на воспалителни состојби.
