Љупчо Палевски, Велибор Манев, Боре Видевски, Влатко Кешишев, добија казна од доживотен затвор за грабнување и убиството на Вања Ѓорчевска.
Судот денеска ја донесе пресудата на ново рочиште. Сите четворица се ослободени од обвиниение за грабнување и убиство на Панче Жежовски, затоа што според Судот, обвинителството не докажало нивна вина.
Таткотото на Вања, Александар Ѓорчевски е ослободен од обвинението. Судските трошоци за него паѓаат на товар на државата.
Во завршните зборови застапничките на обвинението, обвинителките Жаклина Крстевска Јосифовска и Ана Стојковиќ Димитровска побараа судот да им пресуди доживотен затвор на четворицата обвинети за убиствата, а на таткото да му пресуди соодветна затворска казна.
Бранителите на обвинетите побараа ослободителни пресуди за своите клиенти.
По речиси 40 рочишта, судењето кое траеше 10 месеци стигна до крајот. Процесот беше исклучително тежок, на моменти многу емотивен, особено кога се изнесуваа деталите од злосторството врз детето Вања. Нејзините последни часови од животот беа детално опишувани и од обвинителките и од убијците.
Обвинителката Стојковиќ Димитровска рече дека не е нужно да се утврди мотивот за да се докаже нечија вина.
– Казната според Кривичниот законик е од 10 години до доживотен затвор. Нема олеснителни околности за обвинетите. Сите се во зрела возраст, сите се родители, сакале да се и политички фактор. За сите четворица ЈО бара доживотен затвор. Одземање живот на дете не се толерира – рече обвинителката.
