На поголемиот дел од азиските берзи денес цените на акциите пораснаа, како и на Волстрит претходниот ден, додека доларот, по три дена раст, ослабе во однос на кошницата валути.
MSCI индексот на азиско-пацифички акции во 7:00 часот беше во плус 0,2 проценти.
Притоа, цените на акциите во Хонгконг, Шангај, Австралија и Јужна Кореја пораснаа меѓу 0,1 и 1,3 проценти, додека во Индија и Јапонија паднаа меѓу 0,2 и 0,6 проценти.
Така, повеќето берзански индекси го следат вчерашниот раст на цените на акциите на Волстрит. Dow Jones зајакна за 0,49 проценти, додека S&P 500 порасна за 0,61, а Nasdaq индексот за 0,95 проценти.
Нов рекорд на Nasdaq најмногу се должи на скокот на цената на Nvidia за 1,8 проценти, со што пазарната вредност на овој производител на полупроводници достигна 3.970 милијарди долари, што е рекордна пазарна капитализација на една компанија во светот.
Значително, повеќе од 1,4 проценти, пораснаа и цените на акциите на неколку други технолошки гиганти, како што се Microsoft и Amazon.com.
Во фокусот на инвеститорите беше и записникот од последната седница на американската централна банка, на која челниците на ФЕД решија да ги задржат каматните стапки на постојните нивоа.
Записникот покажа дека повеќето челници на ФЕД очекуваат намалување на каматите подоцна оваа година, бидејќи сметаат дека притисокот врз инфлацијата поради зголемувањето на царините може да биде „привремен или скромен“.
Тие пораки ги поддржаа очекувањата на пазарот дека годинава каматите ќе бидат намалени, но не ги поддржаа шпекулациите дека ФЕД би можел да го стори тоа веќе на седницата во јули.
Поради сето тоа, новиот бран зголемување на царините, што го најави претседателот на САД Доналд Трамп, е во втор план.
Откако во понеделникот најави дека од 1 август ќе воведе царини на увоз од 14 земји, меѓу кои и од Јужна Кореја и Јапонија, вчера Трамп најави царини за уште седум земји, како и царини од 50 проценти за Бразил.
Бразилскиот претседател Луиз Инасио Лула да Силва веднаш најави воведување реципрочни царини на увоз на американска стока.
„Пазарите веќе не реагираат толку бурно на вестите за царини како на почетокот на април, кога Трамп најави реципрочни царини. Инвеститорите знаат дека има простор за преговори. Многу од тие најави за царини започнуваат со огромни бројки, но тие не се конечни и обично се намалуваат. Дури и да се воведат, царините во наредните месеци може да се намалат“, објаснува Џеф Нг, стратег во компанијата SMBC.
А на девизните пазари вредноста на доларот во однос на кошницата валути утрово падна, по три дена раст.
Индексот на доларот, кој ја покажува вредноста на американската во однос на останатите шест најважни светски валути, утрово се движи околу 97,40 поени, додека вчера во ова време изнесуваше 97,65 поени.
Притоа, цената на европската валута порасна од вчерашните 1,1715 на 1,1735 долари.
Американската валута ослабе и во однос на јапонската, па курсот на доларот се лизна на 146,30 јени, додека вчера во ова време изнесуваше 147,05 јени.
Цените на нафтата, пак, благо пораснаа. На лондонскиот пазар цената на барелот утрово зајакна за 0,20 проценти, на 70,35 долари, додека на американскиот пазар барелот поскапе за 0,13 проценти, на 68,45 долари.
