Лесна сладолед-торта со богат вкус на малина и кремлива ванила – идеална е за родендени, прослави и летни вечери
Состојки:
За кората:
- 200 г мелени бисквити
- 100 г стопен путер
- 1 лажица млеко
За сладолед-филот:
- 400 мл слатка павлака
- 1 конзерва засладено кондензирано млеко (околу 400 г)
- 200-250 г малини
- 1 лажиче екстракт од ванила
- прстофат сол
- 1 лажица лимонов сок, по желба
За декорација:
- свежи малини
- рендано бело чоколадо или ливчиња бадем
- ливчиња нане
Приготвување:
Најпрво, пригответе ја кората. Измешајте ги мелените бисквити со стопен путер и млеко и мешајте додека добиете хомогена смеса. Втиснете ја смесата во дното на калап (со пречник 20-22 см) обложен со хартија за печење. Ставете ја во фрижидер додека го приготвувате филот.
Потоа, пригответе го сладолед-филот. Изматете ја слатката павлака во цврст шлаг. Во друг сад измешајте кондензирано млеко, ванила, сол и лимонов сок. Полека соединете го шлагот со оваа смеса. Додајте ги и малините: можете да ги оставите како парчиња, да ги згмечите малку со виљушка или да ги испасирате како пире – како сакате. Сето тоа убаво промешајте го за да се распоредат малините рамномерно.
Сипете го приготвениот фил преку кората. Израмнете и ставете ја тортата во замрзнувач најмалку 6 часа, идеално преку ноќ.
Пред послужување, извадете ја тортата 10 минути претходно за да можете полесно да ја сечете. Украсете ја со малини, бело чоколадо и нане за дополнителен визуелен ефект.
Ако не сакате да ја приготвувате кората, можете да ја сипете тортата директно во калап обложен со хартија и да ја послужите како „парфе“.
