Јавната општинска установа Дом за стари лица „Сју Рајдер“ – Битола ја образложи потребата од корекција на цената на услугите за корисниците сместени во установата, посочувајќи дека зголемувањето е резултат на порастот на трошоците за секојдневно функционирање и обезбедување квалитетна грижа.
Како што информираат од Домот, цената за корисниците сместени со индивидуални договори се утврдува врз основа на реалните трошоци за набавка на стоки и услуги неопходни за задоволување на нивните потреби, како и согласно податоците од Државниот завод за статистика за порастот на трошоците за живот во претходната година.
Корекцијата на цените, според установата, е оправдана поради значително зголемување на трошоците за храна, електрична енергија, гориво за греење, средства за хигиена, плати на вработените, одржување на опремата и објектите, набавка на потрошен материјал, како и трошоци за транспорт до други институции, најчесто поврзани со здравствени и лабораториски услуги.
Врз основа на спроведена финансиска анализа на годишните расходи за просечен број од 150 корисници, колку што изнесува и постојано е исполнет сместувачкиот капацитет на Домот, утврдено е дека вкупниот просечен месечен трошок по лице изнесува околу 31.000 денари. Од овој износ, приближно 50 проценти се покриваат преку наменска дотација од Министерството за социјална политика, демографија и млади, преку Централниот буџет, и се однесуваат на платите и надоместоците на вработените.
Од Домот појаснуваат дека во анализираните расходи не се вклучени вложувања во нова опрема, освен трошоци за поправка и одржување на постојната опрема и мали набавки на ситен инвентар.
Согласно направената анализа, предложените коригирани месечни цени би изнесувале 12.000 денари за лица со делумна потреба од помош и нега, односно 395 денари дневно, и 15.000 денари за лица со целосна потреба од помош и нега, односно 493 денари дневно.
Дополнително, од установата наведуваат дека најголемиот дел од корисниците се пензионери, при што најниската старосна пензија изнесува 18.300 денари, што значи дека трошоците за сместување ќе можат да се покриваат од нивните сопствени приходи, без дополнителен товар за семејствата или старателите. Дел од корисниците остваруваат и право на надоместок за туѓа помош, кој исто така претставува дел од нивните лични примања, додека преостанатите средства ги користат за лекови и медицински материјали кои не се вклучени во цената, а се обезбедуваат преку здравственото осигурување.
Од Домот потсетуваат дека цените на услугите последен пат биле изменети во октомври 2013 година, кога изнесувале 9.711 и 11.737 денари по категории.
И покрај потребата од корекција од ЈОУ Дом за стари лица „Сју Рајдер“ – Битола нагласуваат дека како установа од областа на социјалната заштита, ќе продолжат да ги земаат предвид сите социјални и економски фактори кои влијаат врз можноста граѓаните да го остварат правото на сместување во рамки на нивните финансиски примања.
Фото: ЈОУ Дом за стари лица „Сју Рајдер“ – Битола
