До 18:00 часот, на територијата на државата се евидентирани вкупно 25 пожари на отворен простор, од кои 21 се активни. Пожари од попладнево беснеат во Ѓорче Петров, Волково, Орман, Кучково.. Граѓаните се во паника, густиот чад им го отежнува дишењето… Ер тракторот на Дирекцијата за заштита и спасување дејствува во Крива Паланка, додека хеликоптерот на Министерството за внатрешни работи е упатен кон селото Орман, Општина Ѓорче Петров.
Општина Ѓорче Петров информира дека поради појава на повеќе активни пожари на територијата на општината, денеска официјално е активиран кризниот штаб.
Полициски службеници од ОВР Крива Паланка нашле починато лице во близина на пожар во село Лозаново, кривопаланечко. Градоначалникот Сашко Митовски бара помош, бидејќи пожарот излегува од контрола.
Доцна попладневно, повторно се разгоре и пожарот во Чучер-Сандево. Поради разгорување на пожарот, беше затворен патниот правец и граничниот премин Блаце, но по 17 часот сообраќајот е пуштен за патнички возила.
Пожар избувна во Дојран, а гори и во Македонски Брод.
Вечерва заседава владиниот кризен штаб за пожарите во Владата. Претседателката Гордана Силјановска Давкова, потпиша одлука за учество на дел од Армијата во гаснењето на пожарите. Ангажманот на припадниците на Армијата следи по прогласувањето кризна состојба од страна на Владата. Генералштабот на Армијата ќе го одреди начинот на нејзиниот ангажман.
