Државниот санитарен и здравствен инспекторат (ДСЗИ) не констатирал недостатоци во водењето на медицинската документација во прилепската болница и во Клиниката за детски болести во Скопје. ДСЗИ изврши вонреден инспекциски надзор во двете болници откако новороденче од Прилеп, старо десет дена, почина од сепса на Детската клиника во Скопје.
Директорката на ДСЗИ, Рената Младеновска, вели дека нивна надлежност била да ја испитаат целосната документација и за родилката и за новороденчето.
„Ниту во прилепската болница ниту на Клиниката за детски болести не се пронајдени недостатоци. Документациите се уредно водени. Деталниот извештај за вонредниот инспекциски надзор на Инспекторатот се подготвува и треба да биде готов во текот на денот“, вели Младеновска за МИА.
За овој случај министерот за здравство Фатмир Меџити најави формирање стручна комисија, а прилепското Основно јавно обвинителство отвори предмет по пријава на родителите на починатото новороденче.
Веста за смртта на новороденчето одекна откако мајката на починатото бебе проговори за случајот на своите социјални мрежи. Рече дека родила здраво машко дете на 27 октомври, а два дена по породувањето лекарите во прилепската болница ѝ кажале дека новороденчето треба да се зрачи поради жолтица. Детето било препратено на лекување на Детската клиника во Скопје со објаснување дека таму има подобра опрема за лекување на жолтица.
Во објавата на социјалните мрежи, мајката на починатото дете ја обвинува прилепската болница за негрижа и лоша хигиена во родилиштето.
Од Детската клиника рекоа дека новороденчето било донесено во тешка состојба, на кислородна поддршка, а кратко потоа состојбата се влошила. Во меѓувреме откажале бубрезите на новороденчето, па седум дена од приемот на скопската клиника тоа починало. Сите анализи, велат од Клиниката, укажувале на рана сепса која била добиена во текот на пораѓањето.
Ексдиректорката на Клиниката за детски болести, доктор Аспазија Софијанова, изјави дека рана инфекција или сепса кај новороденче најчесто настанува или поради интерхоспитални бактерии или поради инфекција која евентуално би ја имала мајката. Но, тоа допрва треба да се испита.
