Според податоците објавени од Департманот за економија и туризам на Дубаи, големите маркетинг-кампањи, настаните и стратешките партнерства придонесоа Дубаи да биде посетен од 19,59 милиони странски туристи во 2025 година, што претставува зголемување од пет отсто во споредба со 2024 година кога го посетиле 18,72 милиони луѓе од целиот свет.
Само во декември Дубаи го посетиле повеќе од два милиона туристи.
Според шеикот Хамдан бин Мохамед бин Рашид ал-Мактум, престолонаследник на Дубаи и претседател на Извршниот совет на Дубаи, ваквото значително подобрување на туризмот се должи на добрата стратегија, како и на економските амбиции на Емиратот.
Со понатамошно унапредување на исклучителната инфраструктура на градот и градење силни меѓународни партнерства Дубаи ќе продолжи да биде една од најпосакуваните дестинации во светот. Со соработка меѓу сите засегнати страни фокусирани сме да го подобриме квалитетот на услугите во туризмот преку нови иновации, изјави Ал Мактум.
Земајќи ја предвид економската програма на градот, туристичкиот сектор е еден од најзначајните двигатели на економската диверзификација и одржливиот раст. Фокусирани сме на понатамошен развој на интегрираниот туристички екосистем на Дубаи со цел и понатаму да остане водечка светска дестинација за бизнис, одмор и еден од најубавите градови за живеење, работа и посета, додаде тој.
Фото: Јутјуб – принтскрин
