Пожарот во општина Македонски брод зафатил многу голема површина и неговото гаснење оди тешко. Чешкиот хеликоптер дејствува на терен во отежнати услови. Пилотот се симнува на ниска надморска височина и полни вода, а потоа полетува и на повеќе од 1.400 метри ја истура водата и се враќа назад. Денес има девет пожари од кои четири се држат под контрола.
„За жал дождот многу малку ни помогна. На неколку критични места не падна ниту една капка дожд. Во овој момент на територијата на државата имаме четири пожари под контрола. Во текот на вчерашниот ден храбрите пожарникари изгаснаа 33 пожари“, изјави Стојанче Ангелов, директор на Центарот за управување со кризи.
Пожарите изгореа 400 објекти, куќи и викендички во источниот дел на Македонија во 30-тина села. За помош на овие семејства Конференцијата на синдикални организации на Македонија, хуманитарната организација и интернационалната полициска организација отвораат пункт каде ќе се собираат материјални добра за граѓаните кои ги изгубија своите домови. Пунктот ќе биде отворен утре во канцелариите на КСОМ, а волонтерите ќе работат од 16 до 20 часот. На овој пункт сите граѓани ќе можат да однесат конзервирана храна, постелнина, исперена облека со напишани величини на ќесата и патики.
„Од утре почнуваме да собираме поголеми донации во форма на облека и храна и се надеваме дека за неколку дена ќе ги собереме донациите и да ги однесеме на семејствата во источна Македонија“, изјави Владимир Чолаковски, „Хуманитарни акции.мк“.
„Мислам дека ако ништо повеќе ќе ја ублажиме болката на граѓаните. Некои селани напоменаа дека дури и чизмите со кои оделе по нивите им изгореле“, изјави Гоце Делчев Тодев – главен координатор на КСОМ.
„Јас како претседател на Меѓународна полициска организација ИПО ги повикувам сите граѓани, сите регионални директори на ИПО низ цела држава и сите членови на ИПО коишто се во можност да помогнат на граѓаните кој колку може за да им помогнеме на оние кои настрадаа од пожарите“, изјави Ејуп Акија, претседателот на Меѓународна полициска организација.
Во гаснење на македонските пожари интервенираат по еден хеликоптер од Србија, Чешка, Словенија и два од Унгарија како и по два ер-трактори од Шведска и Германија, а пристигнат е и унгарски тим од 46 лица кои се движат со теренски возила на непристапни места.
