Актуелниот шампион на Македонија, Еурофарм Пелистер, го зајакнува составот за остатокот од сезоната. Клубот го ангажира хрватскиот кружен напаѓач Никола Граховац, кој ќе ја пополни празнината по заминувањето на Мохамед Калед Валид.
Граховац, 27-годишен пивотмен висок 201 сантиметар, доаѓа од германскиот бундеслигаш Вецлар и потпиша договор до крајот на сезоната, со можност за продолжување и во следната. Тој веднаш ќе биде на располагање на стручниот штаб на битолчани.
Хрватскиот репрезентативец има богато искуство на големата сцена – настапувал во Лигата на шампионите со Загреб и Веспрем, а прв клуб му е Дубрава. Со националниот тим играше на Европското првенство 2022 и Олимписките игри 2024, а со јуниорската селекција на Хрватска стана европски вицешампион во 2016 година.
Со својот модерен стил на игра, Граховац претставува значајна дополнителна вредност за Еурофарм Пелистер во периодот кој претстои. Новото засилување ќе биде официјално претставено пред јавноста и медиумите до крајот на неделата.
Фото: Официјална страна на РК Еурофарм Пелистер
