Грција потврди 65 локално стекнати случаи на западнонилска треска, од кои 23 биле регистрирани само во изминатата недела, соопшти Националната организација за јавно здравје (ЕОДИ).
Според податоците заклучно со 5 август, кај 54 пациенти се развиле сериозни невролошки компликации, меѓу кои енцефалитис, менингитис и акутна флакцидна парализа. Останатите 11 заразени имале лесни симптоми или кај нив немало зафаќање на нервниот систем.
Здравствените власти досега регистрирале шест смртни случаи. Сите починати биле постари од 65 години и развиле тешка форма на невролошко заболување.
Во болниците сè уште се лекуваат 20 пациенти, од кои осум се сместени на одделите за интензивна нега, а четворица на одделите за зголемен надзор.
Вирусот Западен Нил годинава е потврден во 25 општини во Атика, Тесалија и Централна Македонија. Најпогодена е Спата-Артемида со 11 случаи, пред Маркопуло Месогеас со седум и Палини со пет. Инфекции има и во Лариса, Кардица, Трикала, Пела и во Серес, а неколку случаи сè уште се испитуваат.
ЕОДИ дополнително прогласи седум општини за високоризични поради нивната близина до жариштата и поволните услови за ширење на вирусот.
Властите очекуваат нови заразени и препорачуваат употреба на репеленти, долга облека, заштитни мрежи на прозорците и редовно отстранување на застоената вода во која се размножуваат комарците, за да се намали ризикот од нови инфекции пренесува слободен печат.
