Министерството за земјоделство, водостопанство и шумарство денеска започна со исплата на субвенции за произведениот тутун од последната реколта. Како што информира министерот Цветан Трипуновски, на сметките на 14.502 тутунари ќе бидат префрлени вкупно 2.404.561.224 денари, што претставува речиси 40 милиони евра.
„Тутунарите заслужено ги добиваат овие средства за нивниот труд. Со ова покажуваме дека државата стои зад македонскиот земјоделец“, изјави Трипуновски.
Тој потсети дека при преземањето на одговорноста за управување со државата, биле затекнати бројни заостанати и неисплатени субвенции, за кои земјоделците чекале со години. Според него, новиот пристап, кој се темели на посветена и транспарентна работа, веќе дава резултати.
„Се бориме за секој еден човек. Наша цел е преку дела да покажеме дека Македонија е повторно држава на својот народ“, додаде министерот.
