Во соработка со АД „Водостопанство“ – Подружница Битолско Поле, Општина Новаци денес започна со чистење на 10-от одводен канал. Во првата фаза од активностите е предвидено да се исчистат вкупно 3.000 метри од каналот, а досега е завршена делница во должина од 750 метри.
Моментално се работи на отстранување на нискостеблеста вегетација, трска и шамак, како и оформување на косините по бетонираниот дел од каналот кој поминува низ населеното место Новаци.
Градоначалникот на Општина Новаци, Стевче Стевановски, истакна дека оваа активност е дел од програмата и планот за работа, а нејзината реализација ќе придонесе за подобрување на условите за земјоделците, превентивна заштита од поплави, како и за прибирање на водите од РЕК „Битола“, што ќе има значајно влијание и врз енергетскиот систем.
Фото: Општина Новаци
