На Златибор ќе се гради аеродром, се подготвува земјиште за изградба на писта, објави денес веб-страницата Biznes.rs.
На подрачјето каде што се изведуваат земјени работи, претседателот на општина Чајетина, Милан Стаматовиќ, го најави почетокот на реализацијата на проектот за изградба на аеродромот.
„Во првата фаза од работите, пистата ќе биде долга околу 700 метри, во втората 1.200 метри, а конечната должина ќе биде 2,5 километри. Јавниот интерес е утврден овде, а ние се бориме земјиштето на Земјоделскиот комбинат, кое е блокирано, да го резервираме за такви цели преку јавниот интерес“, изјави Стаматовиќ за агенцијата Рина.
Според него, идејата за изградба на аеродром на Златибор е стара повеќе од две децении, но условите за нејзина реализација се создадени дури сега.
„Уште пред 20 години постоеше идеја Златибор да има свој аеродром за мали и лесни авиони, но сега можностите се многу поголеми – пистата долга 2,5 километри ќе овозможи слетување и на поголеми авиони“, истакна градоначалникот на општината.
