Мојата визија за Битола коинцидира со мојот сон за мојот град и затоа јас како архитект по струка не сакам само да констатирам, туку и да ги решавам проблемите на градот заедно со битолчани, истакна независниот кандидат за градоначалник Зоран Николовски.
Според Николовски, на Битола и треба градоначалник со кредибилитет кој ветеното ќе го исполнува.
-Мислам дека само јас можам да го направам тоа што ќе го ветам и нека не звучи ниту лажно, ниту скромно бидејќи секогаш кога сум дал збор или направил некакава програма, се сум исполнил. Да потсетам кога во два наврати бев раководител на НУ Завод и Музеј-Битола, сите програми што ги аплицирав целосно ги реалиирав. Од таму го влечам мојот кредибилитет за вистинитоста на зборовите што ги кажав, посочи Николовски.
Во изјава за медиумите, кандидатот за градоначалник на Битола Николовски, јавно поддржан и од политичката партија Левица, истакна дека нуди проекти кои се поквалитетни од понудата на неговите против кандидати.
-Јас за разлика од против кандидатите, мојата кандидатура ја насочив во две области. За потсетување, градското подрачје на Битола опфаќа околу 8 проценти од целокупната општина, додека од другата страна е огромна површина со 92 проценти каде се наоѓаат голем број на стопанственици, земјоделци, сточари…кои вредно ги заработуваат своите пари и плаќаат даноци. Ние сме должни да посветиме внимание на тие луѓе и токму затоа кон нив се насочени моите проекти. Еден од тие проекти е окрупнување на земјиштето на земјоделците како значајна мерка која овозможува заштеда на време и пари и позитивно влијание на заштитата на животната средина. Вториот проект е поврзан со донесување регулатива со која ќе се овозможи отворање на приватни бунари во приватни дворови. На овој начин ќе се задоволат потребите на земјоделците за полесно доаѓање до вода. Во мојата програма капитален проект е изградбата на патот до Копанки на Пелистер, и јас ќе го актуелизирам проектот кој што бил направен пред повеќе од 15 години и кој ниту еден градоначалник не го реализирал, а тоа е нов пат до хотелот „Молика“ кој ќе почнува од селото Ротино, преку Магарево, Бегова Чешма до Копанки. Со изградбата на новиот пат ќе се обезбеди кружно движење, а сообраќајот ќе биде побезбеден со зголемена посетеност, истакна Николовски.
Во капиталните проекти на Зоран Николовски сврстени се и изградба на 100 водни турбини во реката Драгор за осветлување на речното корито, како и осветлување на булеварите во Битола со обновливи на извори на енергија, односно со сончева и енергија произведена од ветер.
Фото: МИА
