Зорхан Мамдани победи на изборите за градоначалник на Њујорк

Зохран Мамдани ќе биде новиот градоначалник на Њујорк, станувајќи првиот муслиман и лице со јужноазиско потекло како и најмладиот во повеќе од еден век што ја зазема оваа функција.

„Иднината е во наши раце,“ изјави Мамдани пред громогласни аплауз на прославата на победата во Бруклин.

„Мои пријатели, вечерва соборивме една политичка династија“, рече тој.

34-годишниот Мамдани, роден во Уганда, демократски социјалист, го победи поранешниот гувернер на Њујорк, Ендру Куомо, кој се кандидираше како независен и републиканецот Кертис Слива, според официјалната проекција на резултатите од „Асошиетед прес“.

Ова е извонреден подем за Мамдани, кој беше релативно непознат член на државното собрание, претставник на еден округ во Квинс, кога влезе во натрупаната трка за градоначалник минатата година. Тој победи на демократските прелиминарни избори во јуни со 12 процентни поени предност, брзо станувајќи еден од најпопуларните, но и најконтроверзни политичари во земјата.

Настапувајќи на сцената во вторникот вечерта, Мамдани не се воздржа од своите социјалистички убедувања, отворајќи го говорот со цитат од Јуџин Дебс, социјалистички политичар кој пет пати се кандидирал за претседател на САД на почетокот на 1900-тите.

„Јас ја гледам зората на подобар ден за човештвото“, рече Мамдани, ветувајќи подобри услови за работниците во Њујорк.

Многу од младите поддржувачи на Мамдани, кои се собраа во Бруклин, изјавија дека биле инспирирани од неговиот оптимизам и ветувањата дека ќе го подобри нивниот живот.

„Гласав со моите родители, тоа е наша традиција“ рече 32-годишната Данија Дарвиш, која се опиша како Американка со сириско потекло од Бруклин.

„Мајка ми плачеше цел пат до гласачкото место“, додаде таа.

„Беше многу емоционално за сите нас да видиме кандидат на гласачкото ливче кој нè претставува“, изјави Дарвиш.

Некои од главните изборни ветувања на Мамдани вклучуваа бесплатен јавен превоз со автобуси, замрзнување на стабилизираните ќирии, обезбедување универзална грижа за деца, зголемување на минималната плата до 2030 година и намалување на трошоците за живот преку зголемување на даноците за големите корпорации и најбогатиот 1% од Њујорчани.

Мамдани исто така изјави дека ќе се спротивстави на претседателот Трамп, кој често го критикувал и погрешно го претставувал Мамдани како комунист и повеќепати се заканувал дека ќе го намали федералното финансирање за Њујорк доколку тој победи.

Во својот говор на признавање на поразот, кој одекна со мрачните теми на неговата кампања, Ендру Куомо предупреди на антисемитизам и беззаконие.

„Ни треба полиција за да го одржуваме општеството безбедно. Нема да ја направиме Њујоршката полиција непријател,“ рече Куомо, осудувајќи го притоа социјализмот на Мамдани.

„Ние се движиме по опасен, опасен пат“, додаде тој.

Критичарите укажуваат на релативното неискуство на Мамдани и на политичките предизвици со кои ќе се соочи во обидот да го спроведе својот амбициозен, високо прогресивен план. И покрај неговото повеќекратно отфрлање на обвинувањата за антисемитизам, неговата гласна и долготрајна критика кон израелската влада и дејствијата во Газа го отуѓија дел од гласачите во градот, кој е дом на најголемата еврејска заедница надвор од Израел.

Но визијата на Мамдани за подостапен град, артикулирана преку паметни видеа на социјалните мрежи и позитивни лични средби, очигледно одекна кај младите и гласачите кои првпат гласаа (вклучително и надвор од Њујорк).

Тој доби поддршка од бројни познати прогресивци, мобилизираше десетици илјади волонтери во кампањата и имаше двоцифрена предност во анкетите пред изборниот ден. Младите гласачи, кои најверојатно го поддржаа Мамдани, се заслужни за рекорден одѕив во раното гласање.

Помалку од еден час по затворањето на гласачките места во вторникот, беше јасно дека неговите напори се исплатиле.

Текст и фото: НПР / Асошиетед прес