На 2 и 3 март во малото гратче Миколајки, на североистокот на Полска, се одржа 11. Европски конгрес на локални самоуправи, во организација на Фондацијата – Институт за источни студии (Fundacja Instytut Studiów Wschodnich), која е и организатор на есенскиот Економски форум во Карпач, Полска, кој се одржува секој септември и е познат како „полскиот Давос“.
Европскиот конгрес, чие мото годинава гласеше „Локалните самоуправи во време на несигурност – локални одговори на глобални прашања“, како значаен дводневен европски настан што се одржува секоја пролет веќе единаесет години по ред, успеа повторно да ги собере на едно место локалните и регионалните лидери од Полска, но и бројни политичари, бизнисмени, академици и млади луѓе од цела Европа. Настанот претставува важен форум за дискусија за најголемите предизвици со кои се соочуваат современите градови и региони.
Отворениот дијалог меѓу локалните самоуправи, како ниво на власт кое е најблиску до граѓаните, заедно со претставници од приватниот и невладиниот сектор, академската заедница и меѓународните организации, на овој мартовски настан во Полска традиционално собира околу 3.000 учесници.
„Размислувај глобално, делувај локално“ – оваа идеја совршено ја отсликува суштината на конгресот, кој претставува одлична можност за размена на искуства и дискусија за иновативни европски решенија за предизвиците на локално ниво.
Иван Дургутов како панелист кој ја сподели младинската перспектива учествуваше на дискусијата „Младите и локалната самоуправа – како може да ја изградиме иднината заедно?“.
На панелот, заедно со останатите претставници од Полска, Молдавија, Украина и Франција, Дургутов сподели искуства од активностите што ги реализира како млад човек и граѓански активист, но и преку својата професионална работа во областа на дипломатијата и евроинтеграциите. Во своето излагање тој нагласи дека младите не треба да се гледаат само како потенцијални гласачи, туку и како активни корисници на услугите на локалната самоуправа.
Тој ја истакна важноста на вклучувањето на граѓанското општество во процесите на донесување одлуки, како и активната улога на самите граѓани во креирањето локални политики. Според него, локалните самоуправи во Европа имаат значајна улога во создавањето можности за младите и во развојот на демократските заедници.
„Особено е важно граѓаните да ги чувствуваат локалните власти како отворени и блиски, бидејќи токму на локално ниво се носат одлуки поврзани со клучни области како образованието, детското згрижување и комуналните услуги“, посочи Дургутов.
Меѓу говорниците на настанот беа и полскиот претседател Карол Навроцки и градоначалникот на Варшава, Рафал Тржасковски, кои беа и главни ривали на минатогодишните претседателски избори во Полска. И покрај различните политички визии, двајцата беа поздравени со овации од публиката.
Во нивните обраќања, покрај различните пристапи за иднината на Полска, беа истакнати и некои заеднички позиции, како што се силната поддршка за Украина и придобивките од членството на Полска во Европската Унија, која како земја често се посочува за пример „европско и економско чудо“ и како доказ за трансформативната моќ на Унијата.
Фотографии: Иван Дургутов
