За само 48 часа, на новообележаниот пешачки премин на крстосницата меѓу улиците Ѓорѓи Наумов и Партизанска во Битола, се насобрал видлив талог од издувни гасови, покажуваат фотографии направени на 30 јуни и 2 јули 2025 година што ги објави Јавното претпријатие „Паркинзи“ на општина Битола на својот Фејсбук профил.
Од претпријатието велат дека иако локацијата не се вбројува меѓу најфреквентните делови од градот, загадувањето е очигледно и алармантно.
Овој случај уште еднаш ја потврдува потребата од алтернативни форми на транспорт, како што е велосипедизмот, велат граѓанските иницијативи. Со иницијативата на Општина Битолаза воведување на вело-патеки на улиците Васко Карангелевски и Партизанска продолжува трендот на унапредување на велосипедската култура во градот започнат од 2014 година и се дава можност на љубителите на велосипедизмот на рамноправен начин да учествуваат во сообраќајот барем на 5 километарската патека која ги спојува овие две големи улици.
„Талогот на улиците е само дел од она што не сме го вдишале. Изборот како ќе се движиме низ градот е наш – автомобил или велосипед“, стои во апелот од ЈППЈЛП Битола.
Повикот до граѓаните е јасен: со секој избран велосипед наместо автомобил, градот станува почист, посмирен и поудобен за живеење.
Фото: ЈППЈЛП Битола
