Израел и Иран денес официјално потврдија дека го прифатиле договорот за примирје предложен од американскиот претседател Доналд Трамп, со цел да се стави крај на 12-дневната израелско-иранска војна.
Израелскиот премиер Бенјамин Нетанјаху изјави дека неговата земја се согласила на прекин на огнот со Иран во координација со американскиот претседател Трамп.
„Израел ќе одговори силно на секое кршење на прекинот на огнот“, рече Нетанјаху.
Нетанјаху ја информираше владата дека Израел ги постигнал сите свои воени цели во операцијата против Иран, вклучително и отстранувањето на нуклеарните и балистичките ракетни програми и на военото раководство.
Израел оштети неколку владини објекти и ја презеде контролата врз небото на Техеран, рече Нетанјаху.
Прифаќањето на договорот дојде откако Техеран го започна својот последен ракетен напад врз Израел, при што загинаа најмалку четири лица, а 22 беа ранети, додека Израел пред зори започна блиц воздушни напади насочени кон локации низ Иран.
