Министерството за земјоделство, шумарство и водостопанство (МЗШВ) соопшти дека денеска биле префрлени повеќе од 280 милиони денари на над 4 700 лица кои се корисници на субвенции, како дел од програмите за финансиска помош.
Од вкупниот износ, 269 947 935 денари се префрлени на 4 545 корисници до крајот на јуни. Овие средства се за Мерката 2,3 – директни плаќања за произведено и предадено кравјо, овчо и козјо млеко, согласно Програмата за финансиска поддршка во земјоделството за 2025 година.
За Мерката 2,6 – дополнителни директни плаќања од подмерка 2,5 за одгледани или заклани грла говеда во регистриран кланичен капацитет, се исплатени вкупно 3 746 560 денари на 167 корисници, според Програмата за 2024 година. Во рамки на Мерката 2,16, исто така од Програмата за 2024 година, биле префрлени 7 968 320 денари за произведени или продадени еднодневни бројлерски пилиња и еднодневни женски пилиња од јајценосни хибриди.
„Поддршката на земјоделците продолжува, заедно работиме на стабилен развој на македонското земјоделство“, истакнува МЗШВ.
извор: МИА
