Во последните неколку години, пазарот на земјиште во Македонија бележи значајна динамика, при што неколку региони особено се истакнуваат по бројот на купопродажби.
Податоците од Агенцијата за катастар и изјавите на локалните агенти за недвижности потврдуваат дека интересот за земјиште не е рамномерно распределен низ државата.
На врвот на листата убедливо се наоѓа регионот околу Скопје, особено населените места како Илинден, Ѓорче Петров, Арачиново и Сарај.
Близината до главниот град, добрата инфраструктура и растечката побарувачка за станбени и комерцијални објекти го туркаат интересот кон овие предградија.
„Купувачите бараат поголеми парцели за изградба на семејни куќи или за бизнис наменa. Цените пораснаа и до 40% во последните две години“, вели Марко Николов, експерт за недвижности од Скопје.
Според него, главни купувачи се млади семејства и инвеститори кои планираат изградба на објекти за издавање.
Освен Скопје, сè поголем интерес се забележува и во туристичките региони како Охрид, Преспа и Дојран.
Локациите во близина на езерата стануваат сè попривлечни за оние што сакаат да изградат приватни вили или да отворат туристички капацитети.
„Претходно купувачи беа главно странци, но последниве години сѐ повеќе Македонци инвестираат тука, особено оние што работат во странство и планираат да се вратат“, објаснува Магдалена Велковска Илиеска, агент за недвижности од Охрид.
Таа додава дека плацевите во близина на водата се продаваат многу брзо, дури и по цена што достигнува и до 150 евра за квадратен метар.
Интересно е што раст на купопродажбите се бележи и во руралните области. Региони како Пелагонија, Тиквешија и Гевгелиско стануваат атрактивни за земјоделско земјиште, благодарение на владините субвенции и проектите за органско производство.
„Сè повеќе луѓе сакаат да инвестираат во земјоделие. Има побарувачка за лозови насади, овоштарници и обработливо земјиште“, вели Марјан Стојанов, земјоделски консултант од Битола.
Тој додава дека просечната цена на хектар во тие региони варира од 4.000 до 7.000 евра, во зависност од квалитетот и пристапноста.
Сепак, експертите предупредуваат дека купувањето земјиште во Македонија не е без ризик. Постојат случаи на нерегулирани имотни односи, неусогласени катастарски податоци и ограничувања во градбата.
„Секој купувач треба внимателно да ја провери документацијата и да побара стручен совет пред да инвестира“, советуваат правниците.
Иако цените на земјиштето растат, побарувачката не покажува знаци на слабеење. Факторите како економскиот раст, повратот на печалбарите и зголемениот интерес за руралниот живот дополнително ја раздвижуваат сцената.
Македонскиот пазар на земјиште очигледно се наоѓа во фаза на трансформација – од традиционални зделки до нови модели на инвестирање.
Она што е сигурно е дека земјиштето останува една од најбараните форми на инвестиција, без разлика дали е за живот, бизнис или за спокојно парче земја покрај вода пренесува Денар.
