Иако истече важноста на возачките дозволи со старото уставно име на државата, сепак полицијата нема да казнува туку ќе опоменува и ќе пишува укажувања. Додека пак личните карти на граѓаните со старото уставно име имаат важност до истекување на рокот.
Инаку доколку имате стара возачка дозвола казната изнесува 100 евра. Сепак, министерот за внатрешни работи Панче Тошковски апелира до полицајците да не ги казнуваат граѓаните, туку да им пишуваат опомени.
Според него граѓаните не смее да плаќаат поради тоа што минатата власт не била способна навреме да си ја заврши работата.
Исто така од денеска неважечки се и регистерските таблички на возилата со ознака МК.
Досега се издадени повеќе од 800 илјади возачки дозволи со новото уставно име на државата. Остануваат уште 150 илјади.
Граѓаните имаа обврска да ги променат патните исправи, личните карти и возачките дозволи, согласно Преспанскиот договор, по промената на уставното име на државата. Во договорот беше предвиден рок од пет години за промена на документите.
Во времето на министерот Оливер Спасовски издавањето на новите лични документи предизвика гужви и редици во просториите на МВР кај Mакедонската радио телевизија и на сите пултови за издавање на документи. Турканици и гужви имаше и за време на Короната, но и после тоа. Граѓаните беа гневни бидејќи со часови чекаа да стасаат до некојa од кабините за сликање на МВР. Како решение тогашното министерство на чело со Спасовски ја продолжуваше важноста на документите.
