Во Грција се спроведува пилот-проект со камери опремени со вештачка интелигенција, кои автоматски ги евидентираат сообраќајните прекршоци, а првите податоци откриваат шокантни бројки за однесувањето на возачите.
За само четири дена, на осум локации во Атина се регистрирани речиси 2.500 сериозни прекршоци. Најголем дел од нив, повеќе од 1.000, биле забележани од една камера на авенијата Сингру, која ја поврзува Атина со пристаништето Пиреја. Други критични точки покажале слични прекршоци – на раскрсницата Месогион и Халандрио во Агиа Параскеви 480 возачи поминале на црвено, додека на раскрсницата Вулијагменис и улицата Тину во Калитеа се регистрирани 285 прекршоци.
Камерите не ги снимаат само брзината или преминувањето на црвено светло, туку препознаваат и некористење на сигурносен појас, користење мобилен телефон при возење и неправилно користење на службени ленти. Сите прекршоци се документирани со видео и фотографии, кои се шифрирани за веродостојност. Казните се испраќаат дигитално, со можност за жалба, но доказите тешко можат да се оспорат.
Казните се движат од 150 до 750 евра за пребрзо возење, додека прекршоците како користење телефон или неносење појас чинат 350 евра. Проценките велат дека една камера би можела да генерира казни до 750.000 евра за само три дена.
Министерството за дигитално управување планира масовно проширување на проектот, со 2.000 фиксни камери и 500 мобилни единици на автобуси низ целата земја. Целта, како што истакна министерот Димитрис Папастергиу, е не казнување, туку заштита на граѓаните и намалување на сообраќајните несреќи.
Извор: Журнал
