Мерил Стрип, Ен Хатавеј, Емили Блант и Стенли Тучи официјално се враќаат во „Ѓаволот носи Прада 2“ (The Devil Wears Prada 2), чиешто снимање веќе почна. Студиото „Твениет сенчури“ (20th Century) на конгломератот „Дизни“ ја потврди веста на „Инстаграм“, споделувајќи само кусо видео со две „ѓаволски“ црвени чевли.
Според ИМДБ, покрај ѕвездите од филмот од 2006 година, и глумецот Кенет Брана ќе ѝ се придружи на екипата – како сопруг на Миранда Присли (Стрип) – строгата главна уредничка на списанието „Ранвеј“. Режисерот Дејвид Френкел и сценаристката Алин Брош Меккена, кои работеа на првиот филм, се здружија и за продолжението.
Заснован на романот на Лорен Вајсбергер од 2004 година, филмот „Ѓаволот носи Прада“ ја следи амбициозната новинарка Енди Сакс (Хатавеј) која работи за „сјајно-престижно“ модно списание (работа за којашто милион девојки „би убиле“ за да ја добијат), но се наоѓа „во милост и немилост“ на својата строга главна уредничка која бара премногу работа. Јавна тајна е, инаку, дека оваа книга е барем делумно „автобиографска“ – Вајсбергер кратко работела како асистентка на Ана Винтур во американското издание на списанието „Вог“ (Vogue).
Инаку, Винтур токму минатата недела го најави своето повлекување од местото главна уредничка на „Вог“ – по цели 37 години.
Во продолжението, според непотврдени наводи, Миранда се соочува со ликот на Блант – нејзината поранешна асистентка која сега е моќна извршна директорка на целна луксузна компанија од којашто треба да се извлечат пари… Енди на крајот од првиот филм го напушта „Ранвеј“ и прифаќа работа во друг весник.
„Ѓаволот носи Прада 2“ ќе се прикажува во кината од 1 мај 2026 година.
Фото: Фото исечок
