Италијанскиот прволигаш Реџо Емилија ќе биде првиот противник на Пелистер од Битола во четвртфиналето од квалификациите за Лигата на Шампионите, беше одлучено со денешната ждрепка што се одржа во Лозана.
„Пелистерци“ за првпат во клупската историја ќе бидат дел од едно европско натпреварување, а ждрепката сакаше токму Реџо Емилија да биде прв противник на нашиот клуб во оваа нова авантура.
Согласно правилата на ФИБА, во секој од трите турнири ќе учествуваат по осум екипи, а само победниците на турнирите обезбедуваат учество во групната фаза од Лигата на Шампионите.
Речиси сигурно, поразените екипи ќе имаат можност да ја продолжат европската авантура со настап во ФИБА Европскиот куп.
Победа над Реџо Емилија би значела и пласман во полуфиналето на турнирот, каде Пелистер би се сретнал со победникот од дуелот Орадеа (Романија) – Јувентус (Литванија).
Победникот од овој меч во финалето на турнирот би играл со најдобриот од долниот дел од „костурот“, во кој силите ќе ги одмерат ПАОК (Грција) – СЦ Дерби (Црна Гора) и Бурса (Турција) – Брауншвајг (Германија).
