Кошаркарите на Пелистер со завршувањето на настапот во ФИБА Европа купот сега целосно ги насочуваат погледите кон домашната сцена, почнувајќи од неделниот дуел на гостински терен против Гостивар.
„Пелистерци“ се лидери на табелата со пет победи и еден пораз во првите шест рунди, пласман што ќе сторат се за да го задржат и по ова седмо коло.
„Веруваме во себе, знаеме дека имаме квалитет за да стигнеме до победата против Гостивар. Целосно се фокусираме на домашното првенство и сакаме да останеме први, за тоа да се случи мораме да славиме на вакви натпревари. Наша главна предност е поголемата ротација на играчи, што треба да ни помогне да одржиме висок ритам и на тој начин да стигнеме до триумф“, вели Лука Стојановски.
Гостиварци ќе влезат во овој меч со нов тренер, и тоа поранешниот стратег на Пелистер, Александар Петровиќ, кој токму против „зелено-белите“ ќе дебитира на клупата на новиот клуб.
„Петровиќ е тренер што го познаваме, свесни сме дека тој ќе донесе дополнителна енергија и мотивација кај Гостивар, причина плус да мораме да останеме фокусирани максимално во текот на сите 40 минути“, истакнува Стојановски.
