Универзитетот „Св. Климент Охридски“-Битола е домаќин на експерти од академската заедница, бизнис и граѓанскиот сектор кои дебатираат на тема „Зелена транзиција – паметни патишта за одржлив развој“, колабораториум со серија иновациски процеси специјално дизајнирани за поттикнување на соработка и креативност.
Според универзитетскиот професор д-р Мимоза Богданоска Јовановска, раководител на просторот за колаборација, станува збор за проверена метода што се реализира преку проектот КОЛОРС стекнат од истоимената Алијанса на европски универзитети.
-Проектот Колорс има цел да направи транзиција на универзитетот и доближување до заедницата. На патот на постигнување на таа транзиција, а во рамки на овој проект организираме повеќе настани меѓу кои е и денешниот колабораториум. Тоа е собир кој во себе инкорпорира поголем број на настани од различен аспект што допираат теми лоцирани како проблем и предизвик на заедницата за решавање на воочениот проблем. Ние разработивме три актуелни проблеми, односно социјална инклузија, зелена транзиција и одржливост на храна. Овие проблеми се препознаени и се од интерес на заедницата и затоа почнавме со елаборирање. Најнапред проблемите ги анализиравме од теоретски аспект на ниво на држава, а подоцна низ тркалезни маси и дебати дискутираме за посочениот проблем, посочи Богданоска Јовановска.
Во Студентскиот информативен центар свои трудови презентираа професори од Универзитетот Јан Длугож Чехтосхова од Полска, Универзитетот Леман од Франција, Универзитетот во Кристијанштад-Шведска, како и од двата македонски универзитети УКЛО-Битола и УКИМ-Скопје.
-На овие дебати присуството на студентите е задолжително бидејќи од нив се очекува како млади луѓе и со полетна сила и инвентивност да понудат нови решенија за актуелните проблеми. На колабораториумите учествуваат претставници од АД ЕСМ, РЕК Битола, Агенцијата за поддршка на развојот на земјоделството, невладини организации и претставници на локалната самоуправа затоа што нивното мислење е исклучително важно за заедницата, нагласи Богданоска Јовановска.
Дводеневниот колабораториум завршува утре низ средби со претприемачи и посета на истакната компании што се занимаваат со производство на зелена енергија и здрава храна.
Фото: МИА
