Околу 40 проценти од летовите беа откажани денес на аеродромите Шарл де Гол, Орли и Бове во Париз поради штрајк на француските контролори на летање.
Според соопштението на Националната администрација за цивилно воздухопловство, штрајкот ги погоди и другите поголеми градови – 50 проценти од летовите беа откажани во Ница, а 30 проценти во Марсеј и Лион, објави АП.
И покрај однапред планираните откажувања, властите предупредуваат на можни дополнителни доцнења и застој на сите аеродроми во земјата.
„Рајанер“ објави дека е принудена да откаже повеќе од 400 летови, што влијае на повеќе од 70.000 патници.
Компанијата ја повика Европската Унија да ги реформира правилата за воздушен сообраќај за да се избегнат ваквите прекини.
Штрајкот го предводат синдикатите UNSA-ICNA и други, кои тврдат дека нема доволно персонал за растечкиот број летови и дека инфлацијата ја намалува вредноста на платите. Дополнително негодување предизвикаа реформите што подразбираат построга контрола на работата на контролорите.
Францускиот министер за транспорт Филип Табаро го критикуваше штрајкот, нарекувајќи го „неприфатлив“, особено затоа што се совпаѓа со почетокот на летните одмори и одморите за многу семејства.
