Националната установа Народен театар Битола по пауза од 25 години повторно на матичната сцена ја постави претставата „Секстет“ од Марк Камолети, овој пат во режија на Марјан Георгиевски.
На прес – конференција во Битола, директорот на театарот Васко Мавровски, истакна дека последниот водвиљ на нивната сцена бил поставен во 2001 година, и по подолга пауза на публиката и се нудиме нов современ водвиљ од автор кој напишал над 70 водвиљи.
-Ваква претстава подолго време надостигаше во нашиот репертоар. Мислам дека сме на вистинскиот пат со избраниот репертоар, а тоа го потврдуваат бројките според кои во првиот квартал во 2024 година во битолскиот театар имало 5.389 гледачи, а во 2026 година бројот е зголемен за 58 отсто и во првиот квартал од оваа година имаме посета од 8.390 гледачи. Патем бројот на претстави го зголемивме од 31 на 50, што значи интересот на публиката е огромен, посочи Мавровски.
Во изјава за медиумите, режисерот Марјан Георгиевски истакна дека комедијата не се поставува често на театарските сцени затоа што е многу тежок проект со голема динамика и вложен труд.
-За мене беше голем предизвик да се впуштам во еден ваков процес. Уверен сум дека подготвивме претстава во која публиката ќе ужива. Камолети е еден од најпоставуваните автори на водвиљи, дури во 55 држави, сериозен мајстор во пишувањето на комедија. Оваа комедија денес е потребна затоа што секојдневно се случуваат најразлични сериозни работи во светот, живееме во постојани турбуленции, со стрес и други проблеми и затоа добро е што имаме претстава која ќе дозволи да избегнеме од секојдневието, да земеме воздух и да се насмееме, истакна режисерот Георгиевски.
Главната улога во претставата, ликот на Бернар го игра Николче Пројчевски, а заедно со него настапуваат Катерина Аневска Дранговска, Александар Димитровски, Сандра Грибовска Илиевска, Марија Цветановска и Борче Ѓаковски.
За премиерната претстава закажана за 25 април, костимографијата за актерите ја изработи Андреј Георгиевски, сценографијата е на Влатко Чачоровски, музиката ја подготви Александар Димовски, а дизајнот на постерот е на надворешниот соработник Михајло Димитриевски – Тхе Мичо.
Извор: МИА
