Во Собранието денеска ќе заседава Комисијата за транспорт, дигитална трансформација, животна средина и просторно планирање, на чиј дневен ред е Предлог законот за изменување на Законот за аудио и аудиовизуелни медиумски услуги, во прво читање.
Како што се посочува во образложението објавено на собраниската веб-страна, основната цел на измените на Законот за аудио и аудиовизуелни медиумски услуги е да се воспостави фискално одржлива рамка за финансирање на радиодифузната дејност, преку утврдување на средства кои ќе се обезбедат од буџетот, при што финансирањето се лимитира на 1 отсто од реализираните даночни приходи утврдени во завршната сметка на буџетот за 2023 година.
– Основицата за пресметување на средствата ќе се применува за период од пет години од денот на влегувањето во сила на овој закон. Тоа ќе обезбеди стабилност и предвидливост на финансирањето, без притоа да се наруши ликвидноста и нормалното функционирање на буџетот – посочува во измените на Законот за аудио и аудиовизуелни медиумски услуги.
Додека, пак, пред членовите на собраниската Законодавно-правната комисија се Предлог на законот за изменување на Законот за упатување работници од Република Македонија во други држави за изведување на градежни работи преку проектни договори и за вршење на други сезонски работи, Предлог на законот за игрите на среќа и за забавните игри, Предлог на законот за изменување и дополнување на Законот за данокот на додадена вредност, Предлог на законот за високи раководители, Предлог на законот за соодветна и правична застапеност и Предлог на законот за изменување на Законот за аудио и аудиовизуелни медиумски услуги, сите во прво читање.
Извор: МИА
