Кошаркарскиот клуб Петровски од Битола го освои трофејот во најмладата возрасна категорија во женска конкуренција, предводени од тренерите Никола Петровски и Нора Мемедова.
На завршниот турнир М12-жени во Битола, домаќинот славеше со победа во финалето против Бадел 1862 со краен резултат 51-45 и се закити со златен медал, додека кошаркарките на Бадел ги освоија сребрените медали. Во натпреварот за третото место, екипата на МВП Скопје го совлада тимот на Работнички со 29-45 и застана на третото место на турнирот.
За најкорисен играч (МВП) на натпреварот беше прогласена Јана Наумовска од КК Петровски.
Организаторот на натпреварот, тренерот Кире Петровски, им честиташе на сите учесници на финалниот турнир за борбеноста и спортскиот дух.
„Сакам да им честитам на сите учесници на турнирот Ф4 во Битола за борбеноста, пожртвуваноста на теренот и ферплејот. Ова е првиот ваков настан во Битола, а се надеваме дека нема да биде последен и дека ќе има уште многу кошаркарски турнири во кои ќе ужива битолската публика. Им се заблагодарувам на сите присутни кои од трибините со жар навиваа за нас и беа нашиот шести играч не само во финалето и полуфиналето, туку и на секој наш натпревар“ – изјави за Gol.mk тренерот Петровски, под чија организација се реализираше турнирот.
Тренерот на победничката екипа, Никола Петровски, е презадоволен од победата, иако признава дека борбата за титула воопшто не беше лесна.
„Девојките од КК Петровски лавовски се бореа за секоја топка и на крајот, нашите квалитети се покажаа на теренот. Борбата за титула не беше лесна, бидејќи противникот покажа огромна посветеност и мотивираност. Им честитам на сите екипи кои учествуваа на завршниот турнир, бидејќи сите покажаа дека женската кошарка има просперитет во нашата држава“ – изјави тренерот на младите кошаркарки.
