Коалицијата „Твоја Македонија“ предводена од ВМРО-ДПМНЕ ќе има мнозинство во идниот состав на Советот на Општина Битола, изјави кандидатот за градоначалник Тони Коњановски.
На прес-конференција што се одржа во битолскиот огранок на Социјалистичката партија на Македонија, Коњановски се заблагодари за јавната поддршка од таа партија.
-И во оваа кампања сме заедно со Социјалистичката партија на Македонија, нашиот традиционален поддржувач. Во идниот состав на Советот на Општина Битола очекуваме мнозинство и на тој начин непречено реализирање на нашата заедничка програма, посочи кандидатот и актуелен градоначалник на Битола, Тони Коњановски.
Според носителот на листата Филип Поповски, кадровската и програмската понуда на коалицијата „Твоја Македонија“ се гаранција за квалитетен состав на Советот на Општина Битола.
-Програмските цели ќе ги остваруваме заеднички, што значи и со членовите и симпатизерите на Социјалистичката партија на Македонија чиј претставник на кандидатската листа е Кети Јосифовска. Очекувам токму Јосифовска да се истакне со својата стручност и посветеност и да биде глас на народот што ќе се залага за програмските цели и проекти за подобар и поквалитетен живот на битолчани, истакна Поповски.
За јавната поддршка за кандидатот за градоначалник Тони Коњановски и советничката листа на коалицијата „Твоја Македонија“, на прес-конференцијата во Битола говореа и Александар Вангеловски, претседател на огранокот на СПМ, и Кети Јосифовска, кандидатка за општински советник.
Фото: МИА
