По повод 8 Септември – Денот на независноста, пред споменикот на Народноослободителната и антифашистичка војна во Битола денес беше одбележана 34-годишнината од историскиот референдум кога граѓаните на Република Македонија масовно се изјаснија за самостојна, независна и суверена држава.
Свежо цвеќе положија Градоначалникот на Општина Битола, Тони Коњановски, членови на Советот на општината, Сојузот на борци и претставници на политички партии. Со чинот на положување цвеќе се оддаде почит кон сите кои со визија, жртва и идеал ја градеа современата македонска држава.
Во својата свечена честитка, градоначалникот Коњановски истакна:
„Македонија е сонот на генерациите што се бореа, а денес е одговорност на сите нас. Нашата независност не е само датум од историјата, таа е секојдневна борба, грижа, несебичен влог, но и надеж.На денешен ден, со длабока почит се поклонуваме пред сите кои ја изградиле темелната мисла за македонска држава. Но, погледот ни е насочен и кон иднината и кон младите. Тие се срцето на нацијата, двигателот на промените и најсилниот гарант дека Македонија ќе остане на патот на достоинството и државотворноста. Во време на предизвици, суштински е младите да останат тука, да сонуваат тука, да созреваат тука, да создаваат на нашите простори. Наш заеднички долг е да продолжиме да ја градиме Македонија како земја на можности, слобода и правда каде што секој млад човек ќе има простор да го оствари својот сон, без да се откаже од своите корени, идентитет и иднина.Да не ја заборавиме жртвата на тие што се бореа, но и да веруваме во потенцијалот на тие што доаѓаат. Само со заедништво, љубов кон татковината и визија, можеме да продолжиме да градиме силна, праведна и горда Македонија. НЕКА НИ Е ЧЕСТИТ 8 СЕПТЕМВРИ! НЕКА НИ Е ВЕЧНА МАКЕДОНИЈА!“, порача Коњановски.
Со денешното одбележување, Општина Битола се приклучи на низата активности низ државата во знак на почит кон историската одлука за македонска независност, како и со јасна порака за иднината на младите генерации.
Фото: Општина Битола
