Кугланата во Битола е целосно реконструирана и технички унапредена, со што се создадени услови за нејзино лиценцирање за одржување на домашни и меѓународни кугларски натпревари.
Реконструкцијата опфати поправки и замена на дотраената опрема, за што беа инвестирани околу 5.000 евра. Работите ги изврши лиценцираниот одржувач на куглани, Миле Вулетиќ од Апатин, Република Србија, кој има долгогодишно искуство во оваа област и досега има реализирано реконструкција и подготовка на повеќе од 12 кугларски сали, вклучително и за европски и светски купови.
Денеска увид во извршените активности извршија градоначалникот на Општина Битола, Тони Коњановски, претседателот на Советот на Општина Битола, Бојан Бојкоски, како и директорот на ЈП „Комуналец“ – Битола, Горан Степановски, во чии надлежности е одржувањето на објектот.
Со извршените зафати, кугланата е подготвена за процесот на лиценцирање, а официјалната проверка и издавање на лиценца од овластен претставник се очекува во јануари 2026 година. Со тоа, кугланата во Битола ќе добие дозвола за одржување и на меѓународни кугларски натпревари.
Ова унапредување претставува значаен чекор за развојот на спортската инфраструктура во градот и отвора можност за организирање на поголеми спортски настани со меѓународно учество.
