Кандидатот за градоначалник на Општина Новаци од редовите на СДСМ, Љубе Кузманоски, преку јавно обраќање до жителите на општината ја најави својата кандидатура и визијата за нов четиригодишен мандат, повикувајќи на заедништво, доверба и транспарентно водство.
„Вашата поддршка е огромна, инспиративна и ми дава сила да продолжам понатаму. Одлуката да се ставам повторно во служба на моите сограѓани ја донесов со силна убеденост дека заедно можеме да испишеме нова успешна историја за нашата општина“, истакна Кузманоски.
Во своето обраќање, тој потенцира дека Општина Новаци заслужува модерно, ефикасно и услужно локално раководство кое секогаш ќе биде достапно за граѓаните. Кузманоски се обврза дека во наредниот период лично ќе ги посети сите населени места, ќе разговара директно со жителите, ќе ги сослуша нивните предлози и заедно со нив ќе ја креира програмата за развој на општината.
„Повторно ќе имате градоначалник кој ќе ве прими, ќе ве сослуша и заедно со вас ќе ги решава проблемите, еден по еден. Програмата нема да биде напишана во канцеларија, туку заедно со вас – за вас“, рече Кузманоски.
Тој потсети дека од 2017 до 2021 година веќе ја извршуваше функцијата градоначалник и токму во тој период, како што рече, бил секојдневно достапен за жителите и се реализирале бројни проекти во сите населени места.
Кузманоски истакна дека неговата визија е Новаци да стане европска, зелена, моќна и праведна општина каде секој граѓанин ќе се чувствува важен и почитуван. Тој вети искрен и чесен пристап, без лажни ветувања и празни надежи.
„Ни претстои голема борба, но со јасна цел, сплотени и обединети, ќе успееме. Да си ја вратиме општината на граѓаните, таму каде што припаѓа: отворена, отчетна и транспарентна“, порача Кузманоски.
Со ова обраќање, тој официјално ја започна својата изборна кампања со јасна порака: „Општина Новаци – Твоја иднина!“
