Откривањето на споменикот на војводата Александар Турунџев во Битола, на 120-годишнината од неговата погибија, наиде на остри политички реакции, особено од опозициската СДСМ.
Методија Куновски, кандидат за градоначалник на Општина Битола од редовите на СДСМ, во објава на социјалните мрежи го нарече присуството на поранешниот градоначалник Владимир Талески „сквернавење на чинот на откривање на споменикот“. Куновски оцени дека „рехабилитацијата“ на Талески на ваков настан е неприфатлива, особено ако се земе предвид неговото минато како, според него, „гробарот на Битола“.
„За жал и овој свечен момент ВМРО-ДПМНЕ успеа да го извалка. ‘Гробарот’ на Битола не може и не смее да биде во првиот ред, без разлика што ги нарачал и споменикот и проектот за кружниот тек каде војводата е поставен“, пишува Куновски.
Тој го обвини актуелниот градоначалник Тони Коњановски за „оставен пустош во општината“, оценувајќи дека единствените реализирани проекти за време на неговиот мандат се токму оние што ги наследил од неговиот партиски колега Талески – споменикот и кружниот тек.
Куновски го нарече чинот „последен, очаен потег на ВМРО-ДПМНЕ“, алудирајќи дека ваквото обединување на поранешни и актуелни функционери на партијата претставува или „обид за амнестија на криминалот и лошото менаџирање“, или „собирање на сите на куп“.
