Денеска на програмата беа натпреварите од осминафиналната рунда од Купот на Македонија во фудбал.
Најголемиот ‘кикс’ го направи битолски Пелистер кој на своите фанови му приреди ‘несекојдневно’ изненадување, загуби од второлигашот Шкендија Арачиново на гостински терен.
Второлигашот успеа да го елиминира фаворизираниот Пелистер со победа од 1:0.
Погодокот за екипата на Љупчо Марковски-Калц го постигна Арсим Љамалари во 51. минута, со што му донесе пласман на својот клуб во четвртфиналето од Купот на Македонија.
Покрај арачиновци трката ја продолжува и скопски Работнички за освојување на трофејот во Купот на Македониjа.
На чекор до изненадување беше и штипска Брегалница која беше елиминирана од Работнички и тоа по изведување на удари од белата точка. По 90 минути игра резултатот беше 1:1, а првиот гол беше дело на Џелил Асани уште на самиот почеток од средбата, а Еди Мандак во 51. успеа да израмни.
Во пенал серијата одличен беше голманот на Работнички, Васко Василев кој успеа да одбрани два пенали и на својот тим да му донесе пласман во четвртфиналето.
Место меѓу осумте најдобри обезбеди и Струга ТЛ и тоа по триумфот над Македонија ЃП.
Гостите славеа со 5:0, а серијата погодоци ја отвори Ѓорѓе Ивковиќ во 29. минута. По шест минути игра во второто полувреме Арби Воша зголеми на 2:0, а во 76-тата Басиру Компаоре го постигна третиот гол за гостите.
На четири минути пред крајот на мечот Христијан Малески и носи предност на Струга ТЛ од 4:0, а конечниот резултат го постави Стефан Јевтовски со голот постигнат во првата минута од судиското надополнување.
Настапот во Купот го продолжува и Силекс по гостинската победа од 2:1 во дуелот со Башкими.
Тимот од Кратово поведе во 4. минута преку Дарко Додев. Кумановци во 42 стигнаа до израмнување, а стрелец беше Марко Симоновски. Конечниот резултат го постави Милош Николиќ во 70. минута.
Утре на програмата е дуелот меѓу Вардар и Новаци додека Шкендија од Тетово во четвртфиналниот натпревар против Тиквеш е закажан за 19 ноември.
Претходно меѓу осумте најдобри се најдоа Детонит Плачковица по елиминацијата на Беласица и Охрид Лихнидос кој беше поуспешен од Шкупи.
