Пејачот Ламбе Алабаковски ја препеа песната „Како пиреј“ како најава на продолжението на проектот „Македонијо во срце те носиме“, во реализација на „Скендеровски продукција“. Проектот, се вели, продолжува со истата мисија – да ја слави македонската музичка традиција преку современи аранжмани на добро познати народни песни.
„Токму со новата верзија на легендарната македонска песна ‘Како пиреј’, во изведба на Ламбе Алабаковски и во аранжман на маестро Николче Мицевски, денеска и официјално почнува вториот дел на омилениот проект ‘Македонијо во срце те носиме’. Песната, којашто првично ја отпеа Гоце Николовски, добива современо руво. Но, го задржува својот дух и порака за единство и опстојност. Музиката и текстот на оригиналната верзија се дело на Гоце Николовски и Јован Павловски, а новата изведба претставува мост меѓу генерациите и музичкото наследство. Интересно за оваа композиција е дека истата веќе има две верзии, односно едната била отпеана на ‘Фестивалот Валандово’ во 1994 година, а другата е снимена на касета што валандовскиот Фестивал ја издава истата година и е со мали разлики во изведбата“, соопшти продукцијата.
„Браќа, сестри, Македонци, нема таква сила која може да нè раздели! Браќа, сестри, Македонци, како пиреј сечи, корни, нема да ја истреби…“ се дел од стиховите од песната што во далечната 1994 година на фестивалот Валандово ја отпеа легендарниот Гоце Николовски.
Изведувачи од народната и забавната сцена повторно здружуваат сили за да ѝ подарат на публиката ново музичко доживување. До крајот на летото, љубителите на македонската музика ќе имаат можност да уживаат во сите композиции од проектот, коишто ќе бидат објавувани една по друга, во духот на мотото: „Да ја обоиме Македонија со најубавите звуци!“
Фото: Тимот на „Македонијо во срце те носиме“
