„Ликовната колонија ,Дрен’ ни испраќа светлост во длабочината на нашите срца, што е целта на самите уметници, кои годинава учествувајќи на колонијата, со многу љубов создадоа спонтани дела, кои ќе останат во трајна сопственост на Центарот за култура ,Марко Цепенков’, на Прилеп, на Македонија“, рече Каролина Мицевска на отворањето на изложбата на дела од ликовната колонија „Дрен 2024“.
Изложбата ја отвори м-р Викторија Димеска, историчарка на уметност која потсети дека на 16. издание на меѓународната ликовна колонија учествуваа бројни уметници со моќен креативен потенцијал и особен сензибилитет, кои создадоа дела во неколку стилски правци: фотораеализам, надреализам, симболизам, енформел, асоцијативни апстракции и геометриска апстракција.
Посетителите ќе можат да ги видат делата од Петја Ѓеоргиева од Бугарија, Небојша Станков, Среќко Здравковиќ, Јована Ѓуриќ, Немања Вучковиќ, Милица Алимпиќ-Илиќ од Србија, Радица Лелова Докузовска, Александар Таневски, Светлана Попова, Суарта Луфи, Ангел Коруновски, Валентина Стеваноска и Слободан Милошески од Македонија и прилепчаните Тони Чатлески, Марјан Стојаноски, Столе Дурланов и Никола Димески.
