Кошаркарскиот Клуб Пелистер на одржаното редовно годишно собрание го назначи Бојан Давков за нов претседател, додека за спортски директор е избран, Предраг Созовски, кој во минатото ги бранеше боите на клубот како играч и тренер. Исто така избран е нов борд на директори, кој ќе раководи со клубот, чиј единствен акционер останува Општина Битола.
Првата одговорна одлука на новиот оперативен дел на клубот беше изборот на нов тренер. Ни претставува посебна чест и задоволство што во новиот проект ќе ни се придружи етаблираниот кошаркарски тренер Тане Спасев. Тој се враќа во Македонија токму за да седне на клупата на Пелистер. – стои во соопштението на КК Пелистер.
Новиот тренер Тане Спасев е роден во Штип и работеше со успех во украински Кривбас, како асистент во Турк Телеком од Анкара и во Полска како предводник на тимовите Асеко Проком (Гдиња) и Легија Варшава. Беше дел од стручниот штаб на рускиот гигант Химки, како помошник на познатиот тренер Душко Ивановиќ.
Во Битола доаѓа по последните активности во Романија како селектор на репрезентацијата до 20 години и во полски Лоѓ, каде беше тренер до март годинава. Тој се обрвза на договор со Пелистер за една сезона и веќе започна со работа за формирање на ростерот за сезоната 2026/27. Клубот веќе потпиша со првите нови имиња за следната сезона и наскоро ќе ги официјализира пред јавноста. Претставувањето на тренерот Тане Спасев пред јавноста е предвидено за почетокот на подготовките во Битола и веројатно дополнително ќе биде објавено.
Фото Woytek / Legionisci.com
