Четириесет и тригодишен македонски државјанин бил уапсен во Србија под сомнение за давање поткуп, откако сообраќајната полиција го запрела поради прекршоци на автопатот.
Српското Министерство за внатрешни работи соопшти дека осомничениот З. А. (43) бил лишен од слобода во акција на Управата за криминалистичка полиција и Службата за борба против корупцијата, а по налог на Посебното одделение за сузбивање корупција при Вишото јавно обвинителство во Краљево.
Случајот се случил на автопатот во близина на Краљево, каде што полицајците го запреле автомобилот управуван од македонскиот државјанин.
При контролата било утврдено дека тој ја надминал дозволената брзина и се движел по левата сообраќајна лента иако десната била слободна. Кога сообраќајците тргнале да му издадат прекршочен налог, осомничениот им понудил пари за да избегне санкција.
Полицајците веднаш го пријавиле случајот, по што во постапката се вклучиле антикорупциските служби.
На осомничениот му е одредено полициско задржување до 48 часа, по што со кривична пријава за давање поткуп ќе биде изведен пред надлежен обвинител во Краљево.
