Македонската машка сениорска кошаркарска репрезентација на најдобар можен начин ја започна втората рунда од претквалификациите за пласман на Евробаскетот 2029 година.
Избраниците на селекторот Хозе Марија Берокал одиграа одличен натпревар во Виена и убедливо ја совладаа Австрија со 90:59, за голема победа на стартот од новиот претквалификациски циклус.
Одличен и ефикасен беше почетокот на нашите најдобри кошаркари на гостувањето во Виена.
Македонија тргна фуриозно. Тимот на Берокал погоди три тројки во серија, две преку Ефремовски и една на Мекиќ, за почетно водство од 12:6. Но, тука не застана налетот на нашата селекција.
Во продолжението следуваше серија од 12:0, со која Македонија стигна до високи 26:11, а првата четвртина ја завршивме со убедлива предност од 30:14.
Вториот период донесе нешто помалку поени. Австријците успеаја донекаде да пронајдат дефанзивни решенија, но Македонија и натаму целосно ја контролираше играта и резултатот.
По тројката на капитенот Стојановски, нашата репрезентација дојде и до највисоки 38:16, а сигурната предност беше задржана и до крајот на првото полувреме.
На одмор Македонија замина со водство од 49:30, а веќе тогаш во нашиот состав имавме двајца двоцифрени кошаркари – Ненад Димитријевиќ со 12 и Ефремовски со 10 поени.
Уште подобро го отворивме второто полувреме.
Со серија од 9:2, Македонија брзо стигна до повеќе од убедливи 58:32, а Мозес Рајт стана третиот двоцифрен кошаркар во нашиот национален тим. Во 27. минута од натпреварот во „Спорт Арената“ во Виена, Македонија имаше и највисока предност од 26 поени.
Го добивме и третиот период, по кој на семафорот стоеше 65:44.
Во последните десет минути, нашите кошаркари одиграа максимално рутински. Австрија беше држена на сигурна дистанца, а Македонија без поголеми проблеми ја потврди убедливата и заслужена победа – одличен старт во вториот претквалификациски круг за место на Евробаскетот во 2029 година.
