Фудбалска репрезентација на Македонија вечерва во рамките од 8.коло одигра само 1:1 со Казахстан во натпревар од квалификациите за Светското првенство 2026.
Избраните на Благоја Милевски имаа неколку шанси во првиот дел, но не успеаја да ја погодат мрежата на противникот. Во 54. минута Казахстан неочекувано дојде во водство со голот на Караман, а во 74. минута Енис Барди израмни со прекрасно изведен слободен удар.
Во 19. минута, гостите ја имаа првата сериозна можност. Една нафрлена топка од левата страна се одби над Столе Димитриевски, а напаѓачот Чесноков со глава шутираше над гредата.
Три минути подоцна Кенжебек се закани со удар од далечина, но директно во добро поставениот Столе Димитриевски.
Во 24. минута, прва убава шанса за Македонија. Алиоски нафрли од левата страна, Милан Ристовски шутираше со глава, но Сејсен одбрани.
Најсериозна можност за Македонија во првиот дел се случи во 34. минута. Бојан Илиевски нафрли од десната страна, Милан Ристовски зафати волеј, но голманот на Казахстан одбрани и исфрли во корнер. По корнерот, повторно Милан Ристовски со глава се закани, но Сејсен успеа да одбрани.
Македонија го започна вториот дел со нагласена офанзива. Селекторот Благоја Милевски во игра ги вклучи Костадинов и Чурлинов, повлекувајќи ги Велковски и Миовски.
Во 52. минута, одличен центаршут од Бојан Илиевски до Милан Ристовски, кој со волеј шутираше, но голманот Сејсен повторно се испречи.
На спротивната страна дојде казната – Казахстан дојде до водство во 54. минута.
Динмухамед Караман искористи мешаница во шеснаесетникот и со удар со ножички од блиску ја затресе мрежата на Столе Димитриевски.
Шест минути подоцна Македонија имаше шанса за израмнување. Барди беше проигран на десната страна, ја нафрли топката во петерецот, но Тихо Костадинов не успеа да реализира од изгледна позиција.
Тоа што не успеа Костадинов, го стори капитенот Енис Барди. Во 74. минута беше досуден слободен удар на 30 метри од голот на Казахстан, Барди ја намести топката и испрати проектил во горниот агол, а Сејсен беше немоќен.
Во 84. минута, Македонија имаше шанса за пресврт. Елмас го проигра Трајковски, кој десно го имаше Чурлинов, но се обиде да шутира и погреши.
Во последните моменти, убава можност имаше и Никола Серафимов, но шутираше крај голот.
На крајот, реми за Македонија на домашниот дуел со Казахстан.
КВАЛИФИКАЦИИ ЗА СП 2026
МАКЕДОНИЈА – КАЗАХСТАН 1-1 (0-0)
Арена Тодор Проески.
МАКЕДОНИЈА: Димитриевски, Илиевски, Стојчевски (75′ Серафимов), Зајков, Велковски (46′ Костадинов), Алиоски, Алими (75′ Трајковски), Барди, Елмас, Миовски (46′ Чурлинов), Ристовски (62′ Растодер).
КАЗАХСТАН: Сејсен, Каиров, Касим, Алип, Вороговскиј, Зајнутдинов, Куат, Караман (70′ Калматов), Чесноков, Свиридов (61′ Шушеначев), Кенжебек (61′ Жумат).
Судија: Мартинез (Шпанија).
Стрелци: Барди 74′ (Македонија), Караман 54′ (Казахстан).
Ж. картони: Алими (Македонија), Зајнутдинов, Каиров, Куат, Жумат (Казахстан).
