Забраната за издавање имигрантски визи за државјани на 75 земји, која ја воведе администрацијата на Доналд Трамп, во петокот беше поништена од федерален судија, кој оцени дека таа е „спротивна на законот“ и дека ги надминува законските овластувања на државниот секретар Марко Рубио. Стејт департментот во јануари го суспендираше издавањето имигрантски визи за земји во кои живеат речиси 40 проценти од светското население – меѓу кои Бразил, Колумбија, Египет, Хаити, Сомалија и Русија – со образложение дека на тој начин ќе се спречи влезот на лица кои би „користеле социјална помош и јавни бенефиции“, пишува Си-ен-ен.
Судијката Џенет Варгас од Федералниот окружен суд во Менхетен го оспори образложението на Стејт департментот за оваа мерка и го поништи секое одбивање барање за виза што било засновано исклучиво на тоа образложение што претставува уште еден неуспех на администрацијата на Доналд Трамп во неговата имиграциска политика. Според законот, на имигрант може да му биде одбиен влезот во САД како лице за кое се проценува дека би можело да стане „товар за јавните фондови“, односно лице за кое се очекува дека ќе зависи од државна помош, дури откако конзуларниот службеник ќе ги земе предвид неговата или нејзината финансиска состојба, возраста, здравствената состојба, вештините и семејните околности, пренесува Н1 Белград.
Судијката Варгас утврди дека на американските службеници во практика им било наложено да ги одбиваат барањата за визи на апликантите, дури и на оние кои можеле самостојно да се издржуваат, исклучиво врз основа на земјата од која доаѓаат.
Забраната за издавање визи го суспендираше издавањето визи за постојан престој на лица кои заминувале во САД заради спојување со членови на семејството или заради вработување, но не се однесуваше на неимигрантските визи, како туристичките или студентските.
Наредбата што Рубио ја испратил до сите дипломатски и конзуларни претставништва, а која била вклучена во судските списи, им наложувала на службениците да ги одбијат апликантите дури и кога некое лице „ќе достави дополнителни докази кои покажуваат дека ја надминало основата за одбивање поради можноста да стане товар за јавните фондови“.
Поголемиот дел од 75-те земји опфатени со мерката се наоѓаат надвор од Европа и вклучуваат држави од Карибите, Супсахарска Африка, Балканот, Блискиот Исток, Централна Азија и Југоисточна Азија. Меѓу нив се и неколку американски партнери, вклучувајќи ги Јордан, Египет и Грузија.
Меѓу земјите опфатени со мерката беа и Македонија, Црна Гора, Босна и Херцеговина и Косово.
Администрацијата, сепак, забележа успех во една потесна точка од спорот, бидејќи судијката се согласи дека оваа политика не претставува вид формално правило кое мора да биде ставено на јавна расправа и коментирање пред да почне да се применува.
Варгас, која на функцијата беше именувана од поранешниот претседател Џо Бајден, им даде рок на двете страни до 11 септември да предложат начин за решавање на преостанатите прашања во случајот.
Администрацијата може да поднесе жалба на пресудата.
Си-ен-ен побара коментар од Одделот за правда и од Белата куќа.
