Министерството за внатрешни работи на Северна Македонија информира дека со новите законски измени во управната постапка, забраната за управување со моторно возило, изречена со правосилни судски пресуди, повеќе нема да се впишува физички во возачката дозвола. Со ова се укинува и потребата за плаќање за издавање нова возачка дозвола со впишана забрана.
Наместо тоа, забраната ќе се известува преку дигитален систем – со две СМС пораки и електронска пошта.
Како ќе се спроведува постапката
Прва порака: Информативна, се испраќа приближно седум дена по пополнувањето на изјавата со контакт-податоци. Содржи информации за видот и времетраењето на забраната.
Втора порака: Испраќа се осум дена по првата порака. Од моментот на нејзиниот прием официјално започнува да тече забраната.
Министерството најавува дека во следната фаза ќе се овозможи забраната да започнува веднаш по ажурирањето на податоците. Досега, повеќе од 3.000 забрани се реализирани според новиот дигитален систем.
Важно известување
Забраната не започнува од денот на пополнување на изјавата, туку исклучиво по приемот на втората порака.
Апел до граѓаните
МВР ги повикува граѓаните за кои постојат правосилни пресуди со ваква санкција да се јават во надлежните одделенија за управни работи за ажурирање на контакт-податоците (мобилен број и е-маил адреса).
Граѓаните кои ќе се обидат да избегнат извршување на забраната, а МВР веќе располага со нивни контакти, ќе бидат известени преку СМС и е-маил, по што санкцијата ќе биде спроведена.
Паралелно, автоматизирано се спроведуваат и забраните регистрирани преку системот Безбеден град, со истиот начин на известување.
Со овие измени, постапката станува побрза и поефикасна, а административните процедури за граѓаните значително се намалуваат.
Прв.мк
