Православната Црква не ја отфрла љубовта, ниту дијалогот како човечка средба, но одбива секаков дијалог што ја жртвува вистината заради надворешен мир. Љубовта без вистина станува сентименталност, а единството без вистина – духовна измама, истакна митрополитот г. Петар во своето годинешно Божикно послание.
Митрополитот преспанско-пелагониски и администратор австралиско-новозеландски г. Петар посочи дека Православната Црква е столб и тврдина на вистината.
– Православната Црква не постои како историски компромис, ниту како човечка институција, подложна на духот на времето, туку како тело Христово, столб и тврдина на вистината. Таа не се раководи од потребата за привидно единство, ниту од дипломатска хармонија со светот, туку од верноста кон откровената вистина. Православната Црква не се бори за унија по секоја цена, ниту за компромис со вистината, туку за чистотата на верата што ѝ е предадена еднаш засекогаш од светите апостоли и отци – без додавање, без одземање и без изопачување, нагласи митрополитот г. Петар.
Во Божикното послание до свештенството, монаштвото и верниците од преспанско-пелагониската и австралиско-новозеландската епархија, митрополитот г. Петар потсети на Флорентскиот собор како вечен пример за вистината.
– Историјата на Црквата ни сведочи дека светите отци биле подготвени да поднесат прогонства, заточенија, па дури и смрт, но не и да направат ни најмало отстапување од вистината. Свети Марко Ефески, стоејќи сам на Флорентинскиот собор, ни остави вечен пример дека подобро е да се биде „сам со Вистината“, отколку „со мнозинството во заблудата“. Тој дух не е дух на гордост или непомирливост, туку дух на љубов кон Христа и одговорност за спасението на Црквата, посочи г. Петар и додаде дека православната Црква не ја отфрла љубовта, ниту дијалогот како човечка средба, но одбива секаков дијалог што ја жртвува вистината заради надворешен мир. Љубовта без вистина станува сентименталност, а единството без вистина – духовна измама, нагласи митрополитот г. Петар во годинешното Божикно послание.
Фото: Преспанско-пелагониска епархија
