Премиерот Христијан Мицкоски изјави дека очекува натамошно намалување на цените на горивата, по веќе донесените корекции на Регулаторната комисија.
Тој, одговарајќи на новинарски прашања, потсети дека претходно најавеното намалување веќе е реализирано, при што безоловните горива и дизелот се намалени за неколку денари по литар, дополнително со попустите што ги дава ОКТА. објави Скопје1.мк
„Ние ова го најавивме, се сеќавате во саботата, на прес-конференција во Владата, дека безоловните горива 95 и 98 октани ќе се намалат за 1,5 денари по литар, а дизелот за 2,5 денари“, рече Мицкоски.
Тој додаде дека, според движењата на берзите, постои можност цените да останат на исто ниво или дополнително да се намалат во наредниот период.
„Очекувам дека, од она што го следам на берзите, цените најмалку ќе останат на ова ниво, а можно е и дополнително намалување“, изјави премиерот.
Мицкоски посочи и дека Владата ќе продолжи со мерките за одржување на пониска стапка на ДДВ од 10%, наместо 18%, во зависност од движењата на светските берзи.
Во однос на договорите со ОКТА, тој најави дека попустите ќе продолжат до крајот на април, а се преговара и за дополнително намалување на цената на дизелот.
